Türkmenistanly okuwçy Bütindünýä döredijilik festiwalynda ýeňiji boldy
Moskwanyň Halkara Söwda Merkezinde geçirilen Bütindünýä jemgyýetçilik Assambleýasynyň çäginde «Dünýäniň Çagalary: dostlaşmak wagty» atly Bütindünýä döredijilik festiwalynyň ýeňijilerini sylaglamak dabarasy geçirildi. Bu barada Türkmenistanyň Bilim ministrliginiň resmi saýtynda habar berildi.
Türkmenabat şäherindäki Çagalar sungat mekdebiniň okuwçysy Aziza Bäşimowa bäsleşigiň Baş baýragyna mynasyp boldy. Festiwala dünýäniň 70 ýurdunyň zehinli çagalarynyň gatnaşmagy aýratyn täsir galdyrdy.
Bäsleşige dürli tehnika arkaly ýerine ýetirilen işler: peýzažlar, tebigat we taryhy wakalaryň şekilleri, ülkäniň tebigaty, maşgala durmuşynyň, ýadygärlikleriň, baýramçylyk dabaralarynyň şekilleri we portretler kabul edildi. Ugurlar: «Meniň dünýäm», «Aragatnaşygyň şatlygy», «Agzybir maşgala» we «Gelejek baradaky arzuwlar».
Festiwal «Açyk ýürekler» ilata kömek bermek, ösdürmek we goldamak boýunça haýyr-sahawat gaznasy hem-de maşgala institutyny we adaty maşgala gymmatlyklaryny goldaýan «Atalaryň bileleşigi» Bütinrussiýa jemgyýetçilik guramasy tarapyndan guraldy.
