Moskwa konserwatoriýasynda Magtymguly Pyragynyň mirasy barada umumy sapak geçiriler
21-nji awgustda P.I.Çaýkowskiý adyndaky Moskwa döwlet konserwatoriýasynyň Rahmaninow zalynda geçiriljek Magtymguly Pyraga bagyşlanan konsertiň öňýanynda «Magtymgulynyň mirasy we häzirki zaman aýdym-saz sungaty» atly umumy sapak geçiriler. Bu barada asmannews.ru ýazýar.
Umumy sapagy Maýa Kulyýewa adyndaky Türkmen milli konserwatoriýasynyň aýdym-saz taryhy bölüminiň uly mugallymy Leýla Babaýewa geçer.
Umumy sapagyň esasy maksady beýik şahyryň dünýä medeniýetine, şol sanda aýdym-saz sungatyna goşan goşandyny beýan etmekden ybarat bolar.
Magtymguly Pyraga bagyşlanan çäreleriň Moskwanyň «Dostlary ýygnamak» atly XVIII festiwalynyň çäginde boljakdygyny ýatladýarys.
