Türkmenistan we Azerbaýjan özara Medeniýet günlerini geçirer
APA habarlar gullugynyň habar bermegine görä, Türkmenistan we Azerbaýjan özara Medeniýet günlerini geçirer.Bellenilişi ýaly, şu ýylyň oktýabr aýynda Azerbaýjanda Türkmenistanyň Medeniýet günleriniň, 2026-njy ýylyň aprelinde bolsa Türkmenistanda Azerbaýjanyň Medeniýet günleriniň geçirilmegi meýilleşdirilýär.
Bu medeni çäreler 22-nji awgustda «Awaza» milli syýahatçylyk zolagynda geçirilen ýokary derejeli üçtaraplaýyn duşuşykda gazanylan degişli ylalaşyklaryň iş ýüzünde durmuşa geçirilmegi bolar.
Awazada türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň, Azerbaýjan Respublikasynyň Prezidenti Ilham Aliýewiň we Özbegistan Respublikasynyň Prezidenti Şawkat Mirziýoýewiň duşuşygynyň jemleri boýunça Bilelikdäki Beýannama kabul edilip, onda sebitdäki ýurtlaryň arasynda medeni-ynsanperwer hyzmatdaşlygyň ösdürilmegine aýratyn üns berilýär.
«Taraplar degişli döwlet düzümleriniň we jemgyýetçilik birleşikleriniň, barlag merkezleriniň, ýokary okuw mekdepleriniň, köpçülikleýin habar beriş serişdeleriniň, medeniýet we sungat işgärleriniň arasyndaky gatnaşyklaryň möhüm ähmiýetini nygtap,
medeni-ynsanperwer ugurda hyzmatdaşlyk etmegiň ileri tutulýan ugurlaryny ara alyp maslahatlaşdylar. Taraplar olaryň döwletleriniň we halklarynyň arasynda dostlugy hem-de hemmetaraplaýyn hyzmatdaşlygy mundan beýläk-de pugtalandyrmagyň zerurdygyna
pugta ynam bildirdiler» diýlip, resminamada bellenilýär.
