Türkmenistanda «Ak bugdaý» milli muzeýi 20 ýyllygyny belledi
20 ýyl mundan ozal Türkmenistanda täsin muzeý — «Ak bugdaý» muzeýi myhmanlar üçin öz gapylaryny giňden açypdy.
Aşgabat şäheriniň golaýyndaky Änew şäherinde ýerleşýän «Ak bugdaý» milli muzeýi dünýäde ýeke-täk muzeý bolup, onuň eksponatlary adamzat durmuşynda ak bugdaýyň ýüze çykmagynyň taryhy hem-de häzirki zaman ekerançylyk tehnologiýalary bilen baglanyşyklydyr.
Muzeý 2005-nji ýylyň 15-nji iýulynda açylypdy. Onuň binasy 3 690 inedördül metr meýdany eýeleýär we beýikligi 21 metre ýetýär. Binanyň ýokarysy bugdaý başlarynyň şekilindäki «täç» bilen bezelendir.
Muzeýde birnäçe sergi bölümleri bar. Muzeýiň kolleksiýasy 3 000-den gowrak taryhy eksponatlardan ybarat.
1903–1904-nji ýyllarda gadymy Änewiň çäklerinde amerikan alymy Rafael Pampelli tarapyndan geçirilen arheologiki gazuw-agtaryş işleriniň barşynda 5 müň ýyllyk ak bugdaý däneleriniň galyndylary ýüze çykarylypdy.
Şol gadymy däneler, şeýle hem daşdan ýasalan däne üweýjiler (b.e. öňki II müňýyllyk), el degirmenleriniň daşlary (b.e. öňki III–II müňýyllyk), künji dänelerinden ýag çykarmak üçin ulanylan ýag çykaryjy enjamlar we ilkinji ekerançylaryň durmuşynda ulanylan beýleki enjamlar «Ak bugdaý» muzeýiniň sergileriniň buýsanjy bolup durýar.
Bu muzeý 20 ýylyň dowamynda türkmen halkynyň ata-babalardan gelýän ruhy däplerine ygrarlylygynyň nyşanyna öwrüldi. Türkmenistana gelýän köp sanly myhmanlar bu muzeýe baryp, Köpetdagyň eteklerinde ekerançylygyň nähili dörändigi we häzirki günlere çenli ösüp gelişini gürrüň berýän täsin eksponatlary öz gözleri bilen görmek isleýärler.
