“Ýaşlar bilen beýgelýändir Watanym”
“Halkara parahatçylyk we ynanyşmak ýylynda” toýlary toýlara ulaşýan ajaýyp Diýarymyzda, bedew bady bilen ynamly öňe barýan ýurdumyzda her bir gün toýdur baýrama beslenip gelýär. Ynha sanlyja günden Bitaraplygymyzyň 30 ýyllyk baýramçylygy uly dabara bilen belleniljek günlerinde okuw jaýymyz Maýa Kulyýewa adyndaky Türkmen milli konserwatoriýasynyň ýanyndaky Daňatar Öwezow adyndaky Türkmen döwlet ýörite sazçylyk mekdebiniň “Umumy ynsanperwerlik we durmuş ykdysady dersler” bölümi tarapyndan zehinli talyp ýaşlarynyň arasynda “ZEHINLI ÝAŞLAR” atly bäsleşigi geçirildi.
Hormatly Prezidentimiz «Ýaşlar– Watanyň daýanjy » atly kitabynda: «Her bir döwletiň we jemgyýetiň sazlaşykly ösüşi ylym bilen aýrylmaz baglanyşyklydyr. Şoňa görä-de, Garaşsyz döwletimizde ylym ulgamyny kämilleşdirmäge uly üns berýäris» diýip belleýär. Hut şu parasatly sözlerden görnüşi ýaly, geljegimiz bolan ýaş nesilleriň ylymly, bilimli, maksada okgunly bolup kemala gelmegi boýunça giň gerimli işler durmuşa geçirilýär. Şeýle maksat bilen geçirilen bu bäsleşikde talyplar zehinlerini, öz alýan bilimlerini dürli dillerde okap, gürläp bilmek ukyplaryny açyp görkezdiler.
Bu bäsleşige mekdebimiziň I-II ýyl talyplaryndan düzülen toparlar gatnaşdylar. Bäsleşik 3 şertden ybarat bolup, talyplar 1-nji şertinde Türkmenistanyň taryhy, iňlis dili, rus dili, psihologiýa we pedagogikanyň esaslary, häzirki zaman komýuter tehnologiýalarynyň esaslary derslerinden düzülen dürli soraglara jogap bermekde ýaryşdylar. Soňra 2-nji şertinde türkmen, iňlis, rus dillerinde ýalňytmaçlary aýtmakda ýaryşdylar. Bäsleşigiň 3-nji şertinde bolsa, türkmen we daşary ýurt klassik, estrada, kinofilmlerden alynan aýdymlardan bölekleri diňlemek bilen ýaryşdylar. Zehinli ýaşlardan düzülen toparlar diýseň çekeleşikli, gyzgalaňly bäsleşdiler. Emin agzalar talyplaryň zehinlerine görä baha berdiler we bu bäsleşikde I orna “Sungat” topary , II orna “Owaz” topary, III orna “Ýyldyz” topary, höweslendiriji baýraga bolsa “Güneş” topary eýe boldular. Bäsleşikde öz zehinlerini görkezen, bäsleşen talyplara hormat hatlary we sowgatlar gowşyryldy.
Gahryman Arkadagymyzyň, Arkadagly Gahryman Serdarymyzyň taýsyz tagallalary netijesinde milli medeniýetimizi, sungatymyzy, edebiýatymyzy gadymy şöhratly taryhymyzy dünýä ýaýmakda alyp barýan uly işleri üçin dabara gatnaşyjylar köp sag bolsun alkyşlaryny aýtdylar.
Türkmen Halkynyň Milli Lideri, Gahryman Arkadagymyzyň, Arkadagly Gahryman Serdarymyzyň janlarynyň sag, başlarynyň dik, döwlet ähmiýetli, il bähbitli tutýan tutumly işleri rowaçlyklara beslenmegini tüýs ýürekden arzuw edýäris!
Hudaýberenowa Bägül
Maýa Kulyýewa adyndaky
Türkmen milli konserwatoriýasynyň
ýanyndaky Daňatar Öwezow adyndaky
Türkmen döwlet ýörite sazçylyk
mekdebiniň “Aýdym aýtmak sungaty”
bölüminiň II ýyl talyby
