Okuw-usulyýet maslahaty
Okuw-usulyýet maslahaty
Berkarar döwletiň täze eýýamynyň Galkynyşy döwründe Türkmenistan ýurdumyz özüniň ösüş derejelerini barha ýokarlandyrýar. Hormatly Gahryman Prezidentimiziň başlangyjy bilen Türkmenistanda milli bilim we medeniýet ulgamyny kämilleşdirmek, giň gözýetimli, innowasion tehnologiýalary dolandyrmaga ukyply ýaşlary terbiýeläp ýetişdirmek boýunça uly tagallalar edilýär.
Maýa Kulyýewa adyndaky Türkmen milli konserwatoriýasynyň ýanyndaky Daňatar Öwezow adyndaky Türkmen döwlet ýörite sazçylyk mekdebinde zähmet çekýän mugallymlary 2025-nji ýylyň ýanwar aýynyň 23-ne we 24-ne saz ugry boýunça zehinli çagalaryň bilim alýan Şükür bagşy adyndaky Arkadag şäher çagalar sungat mekdebine, şeýle hem Aşgabat şäheriniň çäginde ýerleşýän çagalar sazçylyk we sungat mekdeplerine ýörite toparlar döredilip okuw-usulyýet maslahatyna gatnaşdylar.
Maslahatda bolan wagtlarynda sazçylyk we sungat mekdeplerinde bilim berýan mugallymlaryň halypa-şägirtlik ýoly, döredijilik işleri, ussatlyk sapaklary, okuw prosesinde ulanylýan häzirki zaman innowasion usullaryny peýdalanmak, okuw-usuly maslahatlary geçirmek ýaly meselelere seredilip, degişli maslahatlar berildi.
Asudalygyň, abadançylygyň mekany bolan ata Watanymyzda adamlaryň bagtyýar durmuşda ýaşamagy hem-de biz medeniýet we sungat adamlaryna döretmäge giň mümkinçilikleri döredip berýän Gahryman Arkadagymyza, Arkadagly Gahryman Serdarymyza mekdebimiziň mugallymlarynyň we talyp ýaşlaryň adyndan köp-köp alkyşlar aýdýarys.
Ogulşeker Gurbanlyýewa,
Maýa Kulyýewa adyndaky TMK-nyň
ýanyndaky Daňatar Öwezow adyndaky
Türkmen döwlet ýörite sazçylyk mekdebiniň
“Sazyň taryhy we nazaryýeti” bölüminiň mugallymy
