Nowruz geldi ilime!
Eziz Watanymyza ýaz geldi, güller açyldy, tebigat täzeden janlandy. Bahar pasly gözelligiň paslydyr, şeýle hem gülleriň hoşboý ysynyň bark urýan ajaýyplygydyr. Şu ajaýyp pasyl ynsanlaryň kalbyny heýjana salýar, joşdurýar. Ülkämiziň dag-çöl baýyrlygy ýaz paslynda ýaşyl begresini geýip, al elwan güllere beslendi.
Ynha bu gün Maýa Kulyýewa adyndaky Türkmen milli konserwatoriýsynyň ýanyndaky Daňatar Öwezow adyndaky Türkmen Döwlet ýörite sazçylyk mekdebiniň agzybir döredijilik topary Halkara Nowruz güni mynasybetli “Ýaşlyk” teleýaýlymy bilen bilelikde diýarymyzyň gözel tebigatynda aýdym-sazly söhbetdeşlik gurnalyp, ajaýyp konsert geçirildi.
Bu baýramçylyk mynasybetli mekdebimiziň estrada orkestri we tansçylar topary bilen bilelikde, Gahryman Arkadagymyzyň, Arkadagly Gahryman Serdarymyzyň baştutanlygynda dost-doganlygyň barha batlanýan günlerinde, abadançylygyň, parahatçylygyň, agzybirligiň, jebisligiň waspyny edýän ajaýyp aýdym -sazly tanslar bilen çykyş etdiler.
Şol estrada toparynyň sazandarlyk etmeginde mekdebiň “Aýdym aýtmak sungaty” bölüminiň aýdymçy talyplarynyň ýerine ýetirmeginde Täjigistan respublikasynyň aýdymlaryndan “Nowruz” aýdymy bilen Bägül Hudaýberenowa, Azerbeýjan döwletiniň “Gözel” aýdymy bilen Söhbet Maksatmyradow, “Nowruz geldi” aýdymy bilen Rejepmyrat Kakamyradow dagylaryň ýerine ýetirmeginde ajaýyp aýdymlar ýaňlandy.
“Çandybil“ depçiler topary hem şowhunly sazlaryny ýerine ýetirip, has hem baýramçylyk dabaramyzyň şowhunyny artdyrdylar. Şeýle-de mekdebimiziň hor topary hem gözel ýaýlamyzyň eteginde läle kakyp aýdym aýtdylar.
Halypa mugallym Aşyrmyrat Ýazmyradowyň ýolbaçşylyk etmeginde gargy tüýdükçiler toparynyň türkmen ýaýlasynda çalan sazlary türkmen halkynyň medeni mirasyna mahsus bolan, Nowruz baýramçylygynda türkmen milli däp-dessurlary biziň günlerimize gelip ýeten çarwaçylyk, maldarçylyk, Nowruz ýaýalasynda ak öýleriň hatar tutup gurluşy, ene-mamalarymyzdan bize miras galan keşdeçilik sunagtyndan başgada, milli tagamlarymyz, gazanlar atarylyp Nowruz baýramy mynasybetli taýýarlanýan, türkmen tagamy semeni bişiriliş däp-dessurlary gargy tüýdügiň owazynda şol pursatlar göz öňünde janlanýar.
Biz ýaşlara okamaga, öwrenmäge, döretmäge, öz alan bilimimizi, ýerine ýetirýän aýdymdyr-sazlarymyzy halk köpçüligine ýetirmäge uly mümkinçilikler döredip beren Milli Liderimiz Gahryman Arkadagymyza, Arkadagly Gahryman Serdarymyza köp sagbolsunlarymyzy aýdýarys. Goý olaryň, janlarynyň sag, başlarynyň dik, tutýan tutumly işleriniň elmydama rowaçlyklara beslenmegini arzuw edýäris.
Milli Bahar baýramy, Halkara Nowruz güni bilen Gahryman Arkadagymyzy, Arkadagly Gahryman Serdarymyzy we ähli türkmen halkyny gutlaýaryn! Toýlaryňyz toýlara ulaşsyn!
Aýdym aýytmak sungaty bölüminiň IV ýyl talyby Hojagurbanowa Ogulbagt
